Поиск



Счетчики






Яндекс.Метрика





2. «Хождение Пименово в Царьград»

Тоя же весны Пимин митрополит втретьи поиде в Царьград к патриарху, а с ним Михаил владыка Смоленьскый, да Сергий архимандрит Спаский, да старцы его, и слуги, и протопоп и протодьякон и иные священники и дьяконы. Бысть же начало пути тому от града Москвы месяца априля в 13 день, в великий вторник Страстные недели. Князь великий же Дмитрей Иванович понегодоваше на митрополита о сем, яко без его совета поиде, бе бо и распря некаа промежь их. И сице сотворися шествие, и повеле митрополит Пимин Михаилу владыце Смоленьскому, да Сергию архимандриту Спаскому, и всякождо, аще кто хощет, писати сего пути шествование вое, како поидоша, и где что случися или хто возвратится, или не возвратится вспять; мы же сиа вся писахом. И сице поидохом от Москвы, якоже напреди писахом, и приидохом на Коломну в субботу в великую, а в святую неделю Пасхы поидохом к Рязани по реце по Оке и пришехом к Перевитску, и ту срете нас Еремей епископ Рязаньский Гречин. И приближшимся нам ко граду Переславлю, и сретоша нас сынове великого князя Олга Ивановичя Рязаньского; и тем отшедшим и нам мало от своего места прешедшим; и срете нас с великого любовию сам князь велики Олег Ивановичь, и з детми своими, и з бояры. И пришедши нам ко граду Переславлю, и сретоша нас со кресты; пришед же митрополит в соборную церковь, и молебнаа совършив, и пирова у великого князя, и честь многу приат; и сице безпрестани чествоваше нас со своим епископом Еремеем Гречином. Таже исходящим нам оттуду, проводи нас сам князь великы Олег Ивановичь Рязаньский и з детми своими, и а бояры, о многою честию и с любовию. Таже целовавшеся, разлучихомся; он возвратися ко граду, мы же поидохом напред; и отпусти с нами боярина своего Станислава с довольною дружиною, повеле нас проводити до реки до Дону, с великым опасением, розбоя деля. Проводиша же нас тогда епископи мнози: Феодор Ростовьский, Ефросин Суждальский, Еремей Гречин епископ Рязаньский, Исакий епископ Черниговьский, Данило епископ Звенигородцкий, и архимандрити, и игумени, и иноци. Поидохом же от Переславля Рязаньского в неделю Фомину. Провадиша же с нами и три струги, да насад на колесах; в четверток же приидохом к реце Дону и спустихом суды на реку на Дон. И в вторый день приидохом до Чюр Михайловых; сице бо тамо тако нарицаемо есть место, некогда бо тамо и град был бяше, и ту утешение вземше и о господе целование сотворше, и с радостию и со умилением проводиша нас епископи, и архимандрита, и игумени, и священници, и иноци, и бояре великого князя Олга Ивановичя Рязаньского, целовавшеся вси целованием святым, и от того места возвратишася в свояси.

Мы же в неделю святых мироносиц оттуда с Пименом митрополитом вси поидоша: Михайло епископ Смоленьский, и Сергий архимандрит Спаский, и протопопи, и протодьякони, и священници, и иноци, и слуги, влезше в суды, и поплыхом рекою Доном на низ. Бысть же сие путное шествие печално и унылниво, бяше бо пустыня зело всюду, не бе бо видети тамо ничтоже: ни града, ни села; аще бо и быта древле грады красны и нарочиты зело видением места, точью пусто же все и не населено; нигде бо видети человека, точию пустыни велиа, и зверей множество: козы, лоси, волцы, лисицы, выдры, медведи, бобры, птицы, орлы, гуси, лебеди, жарави, и прочая; и бяше все пустыни великиа. В вторый же день речнаго плавания минухом две реце, Мечю и Сосну; в третий же день проидохом Острую Луку; в четвертый же день проидохом Кривой Бор; в шестый же день приспехом до усть — Воронежа реки. Наутрие же в неделю, на паметь святаго чюдотворца Николы, приеде к нам князь Юрьи Елетцкий з бояры своими и со многыми людми; посла бо к нему вестника князь велики Олег Ивановичь Рязаньский, он же сотвори поволенное и воздаде нам честь, и радость, и утешение велие. Оттуда же приплыхом к Тихой Сосне и видехом столпы камены белы, дивно же и красно стоят рядом, яко стози малы, белы же и светли зело, над рекою над Сосною. Таже минухом и Черленый Яр реку, и Бетюк реку, и Похорь реку. В неделю же пятую, о Самаряныне, минухом пловуще реку Медведицу, и Горы Высокиа реку, и Белый Яр реку. В понеделник же пловуще минухом горы каменыа красныа, во вторник же Серклию (Терклию) град минухом пловуще, не град же убо, но точию городище; таже и Перевоз минухом и тамо обретохом первие Татар много зело, якоже лист и якоже песок. В среду же пловуще минухом Великую Луку и царев Сарыхозин улус; и тако оттуду начя нас страх обдержати, яко внидохом в землю Татарьскую, их же множество обапол Дона реки, аки песок. В четверток же пловуще минухом Бек-Булатов улус, стада же Татарскиа видехом толико множество якоже ум превосходящь: овцы, козы, волы, верблюды, кони. Таже в пяток минухом Червленыа горы; в неделю же шестую, Слепого, пловуще минухом Ак-Бугин улус, и ту многое множество Татар, и всяких скот стады без числа много. От Татарь же никтоже нас пообиде, точию, воспросиша ны везде, мы же отвещахом, и они слышавше, ничтоже нам пакости творяху, и млеко нам даяху, и сице с миром в тишине плавахом. В понеделник же проидохом Бузук реку. Канун в вознесеньева дни приспехом пловуще до моря, града Азова1.

Примечания

1. ПСРЛ. т. XI. СПб., 1897, стр, 95—96.

Предыдущая страница К оглавлению Следующая страница